- भुँडीपुराण प्रकाशनको “अचानो” डा. रमेश शुभेच्छुद्वारा तयार पारिएको कवितासङ्ग्रह हो ।
- प्रस्तुत अचानो सङ्ग्रहका कविता पढ्दा रमेश शुभेच्छु आफ्नो अन्तस्करणको सुखका निम्ति कविता लेख्ने कवि हुन् र उनी युगसचेत पनि छन् भन्ने कुराको अन्दाज सजिलैसँग गर्न सकिन्छ । उनले यस सङ्ग्रहका कवितामा आफूले देखेभोगेकै जीवनजगत्का विविध सन्दर्भसामग्रीलाई र भावसामग्रीलाई विषयवस्तु बनाएका छन् ।
- त्यस्ता विषयवस्तुलाई उनले विभिन्न कवितामा सूक्तिमय बनाई व्यक्त गर्ने प्रयास गरेका छन् र त्यसबाट उनले आफ्नो अनुभवजन्य सारलाई सर्वहितार्थ सम्प्रेषित गर्न खोजेका छन् । वास्तवमा उनले यहाँ आफ्नै वरपरबाट टिपेको सन्दर्भसामग्रीमूलक विषयलाई साधारणीकृत तुल्याई सद्यःपरनिवृत्तिको प्रयोजन प्राप्तिजन्य रसास्वादका तहसम्म पुर्याउन खोजे पनि मूलतः स्वान्तसुखायमूलक र सर्वजनहितायमूलक सुमधुर कलात्मक वाणीले ओतप्रोत तुल्याई व्यक्त गरेका छन् ।
